本港當押業向來予人神秘印象，且衍生一些「都市傳說」，如山窮水盡才入當舖、典當物品會被店員瘋狂壓價等，其實多屬誤解。香港國際錢幣展銷會暨古董錶交易會（HICC）執行董事、港九押業商會理事孔慶森（Sam），擁有近40年行業經驗，上世紀八十年代後期開始協助打理家族的押店，到近年他部署交棒，專注鐘錶生意及HICC品牌；這位鐘錶界「二叔公」（當舖店員「朝奉」的俗稱）最近接受本報專訪，拆解外界對當押業的迷思。
當押屬高門檻行業，一般要經熟人介紹始能入行，Sam的父親早年從內地來港，在親戚經營的當舖工作，後來自立門戶；而Sam完成學業曾短暫任職紀律部隊，其後決定返祖業幫手，「初時乜都唔識，由秤一両金、一隻錶學起，嗰時仲有好多特別嘢當（押）：火機、筆、相機、錄影機、手提攝錄機……呢類非金銀珠寶首飾都唔少。」押店職員何解叫「朝奉」？因典當者像朝聖般把物品高舉奉上；至於俗稱「二叔公」，有傳是「二叔」與「易贖」諧音，又因朝奉全為年長男性，因而得名。
多為周轉非沒錢 無開天殺價
談到客源，Sam透露近年外傭出入當舖愈來愈多，相對於八十年代，則幾乎絕無僅有，「當時舖頭喺大埔，（客戶）主要係水上人、蜑家人，外界覺得有經濟困難先至搵當舖，其實唔一定，當年錢銀周轉不及今日容易，好多當嘢嘅人並非真係無錢，只係一時需要周轉，例如做生意買貨，仲有賭錢，有人開（地下）賭檔，做莊隨時要現金周轉，都幾多呢類生意，另外喺麻雀館輸咗，可能戴隻金勞（勞力士金錶）都萬幾蚊。
當舖的營運主要賺利息和差價，因此開價大有學問，入行多年的孔慶森駕輕就熟，「通常有個門路check（查）到物品價錢，金有金價、錶有錶價，就算其他『立雜嘢』，都可以喺市場搵到大概定價；金最簡單，睇當天報價幾多，假設一萬蚊一両，你無理由當一萬一啩？當9000蚊，有1000揸手，唔夠？8000！個客可能話『有冇搞錯，一萬當8000？』，大家慢慢negotiate（談判），可能講緊十幾個%。」
多年來無數影視作品，只要涉及當舖情節，當押人總是誠惶誠恐地入內幫襯，被朝奉開天殺價，惟Sam澄清現實絕非如此，「壓價無用！掉返轉你攞層樓去按，銀行壓到你得返20%，即係想唔做你生意，個客會走，對生意無好處；你壓到咁低，生意額咪低囉；做當押唔同收購，件貨銀碼要有返咁上下先賺到利息。」
九成物品會贖回 外傭客日增
另一「習非成是」的迷思，有很多人以為當押物大多「一去無回頭」，事實不然，「我哋從來唔預攞去變賣，根據經驗，差唔多90%客最後會返嚟贖，即係抵押，一般4個月期限，亦可以再傾，唔會一到4個月立即一刀切；而外傭贖返物件嘅比率同樣好高，不過濕碎啲，佢哋如果當（押）貴嘢，就十居其九死梗（斷當）。」
以往外傭偷僱主物件典當事件偶有所聞，這方面Sam絕對有經驗應付，「外傭一般拎來（當押）嘅金飾、手錶或其他物品，個style（風格）係同我哋本地人有啲唔同，例如拎隻龍鳳鈪嚟，諗都諗到（有古怪）。」根據現行《當押商條例》，開當舖要先取得警務處處長發出的牌照，條件包括不得收取任何未滿17歲人士當押物，以及要先檢查對方身份證明文件等。
不說不知，業界與警方一直有溝通機制，「我哋要將每日入嚟當嘢嘅客人資料呈報畀警方：人名、地址、身份證號碼、當啲乜、幾月幾日當幾錢，警方再喺內部（系統）check，睇有無人報失。」
近年市場貸款模式愈趨方便，會否影響當舖生意？「客人係少咗，尤其真係好窮嗰班，而家主要係真正做生意嘅客，同埋（押物）銀碼不跌反升，因為物價貴咗。」
每間當舖裝修格局大同小異，門口必定有個屏風（又稱遮醜板），相傳是為免當押者被街外人看到而尷尬，也有說法是當舖「擋煞」之用；另外還有永遠高高在上的櫃枱，外界普遍認定是想營造「他上你下、人尊你卑」之感，減低當押人議價能力，惟Sam強調，這種設計主要是保安考慮，一來讓朝奉看清四周環境，同時防止街外人看到櫃枱內部情況。
身為押店掌舵人，Sam整日面對金銀珠寶和古董名錶，漸漸成為專家；九十年代末至千禧年初，他眼見名錶市場發展蓬勃，靈機一觸，與朋友合作涉足買賣，在日本搜羅勞力士等名牌回港銷售，「當年資訊未咁發達，你手握多少少已經好易跑贏，加上日本款比香港多，利潤都幾可觀。」
背後人生百態 既唏噓也感觸
典當的人背後各有故事，Sam見盡人生百態，「有時同佢（當押人）溝通過程中，真係感受到有幾需要（周轉），之前有個婆婆嚟當對龍鳳鈪，無幾耐佢嫁女，婚宴一定要戴，我哋信佢，無條件借出一晚，等佢喺屋企人面前過到骨，結果第二朝真係拎返嚟，最後並無贖返。」
另一次有位少婦，帶着只有7、8歲的女兒到來，表示要當小朋友部手機，女孩一言不發摔開母親的手，逕自走出店外，「當下個感覺其實都幾淒涼，我諗個女從此會好討厭當舖，但我又無理由自己送幾千蚊畀佢，唯有盡量出個高啲嘅價。」
本港目前約有近200間持牌押店，當中100多間屬港九押業商會會員，現為商會理事的Sam，一直對業界有份情意結，「始終老本行，適應咗」，惟他近年已把當舖交予姪兒及團隊營運，主力發展鐘錶及HICC品牌【見另稿】，尤其後者，「有份使命，用咗咁多心機，做咗咁多去傳承呢個品牌（HICC），當然希望不負所託。」
採訪、撰文：許鎮邦
攝影：黃勁璋、受訪者提供
來源：https://www1.hkej.com/dailynews/finnews/article/3560124/「二叔公」孔慶森揭開當舖經營奧秘